التستر التجاري أو تجارة الظل

 التستر التجاري هو أن تجيب عمال يشتغلون في محلك ويعطونك راتب؟ بدلاً من تعطيهم أنت راتب؟ كيف ؟ تطلع لهم رخصة المحل وتستأجر لهم المحل باسمك فقط وهم يدفعون الإيجار ويشترون المعدات ويديرون المغسلة أو المطعم أو محل السباكة والكهرباء أو أي نشاط، ويسددون فواتير الكهرباء وغيرها، أنت ليس لك إلا الاسم فقط. ويعطونك مبلغ بسيط كل شهر 5 الاف أو أقل. وهم لهم النصيب الأكبر. 

مثال البقاله. تعرف أنها يديرها صاحبها إذا فيه نقص مواد والأرفف شبه فارغة والأغراض فيها غبار ولا يوجد توصيل والمواد لابد تحصل حبه أو أثنين منتهي تاريخها. فهذه بقالة يديرها صاحبها وهذا متبع النظام لكن العمالة مهملين لأنهم ضامنين رواتهم كل شهر. 

لكن إذا لقيت بقالة على العكس نظيفه والبضائع متوفرة بكثرة والزبائن كثيرين وجميع المنتجات التي يحتاجها الناس يومياً متوفرة وفيه رقم طلبات ودباب توصيل وإذا طلبك مو موجود نفسه الدباب يجيبه لك من سوبرماركت أو بقاله ثانية بدون ماتدري وباقي يوصل لك الطلب إلى داخل المطبخ ويحمل معك دبات الماء بالسيارة ويدللك فأعلم أنه فيه تستر تجاري أو ما يسمى تجارة الظل، يعني البقاله للعمال والمالك ماله إلا الاسم فقط ويعطونه مبلغ آخر كل شهر يسكتونه لإستخدام اسمه. 

ووزارة التجارة تكافح هذا الشيء، تريد منع تربح العمالة أكثر من المواطن نفسه ومن ثم يرسلون تلك الأرباح إلى بلادهم، يعني إخراج سيولة من البلد.

لكن هذا بالغالب وليس كل الانشطة التي يديرها صاحبها بنفس الوضع! لا فيه أنشطة يديرها صاحبها ووضعها ممتاز لأنه متابع لنشاطه بالفواتير ونظام الكاشير والكاميرات والحوافز للعمال ينقصها إذا شاف تقصير وهكذا ضابط نشاطه. 

الجهات الحكومية كيف تضبط النشاط المتستر عليه أو تجارة الظل؟ يضبطونه بالتفتيش، مثلًا يكتشفون تحويل أموال من العماله إلى صاحب النشاط! يفترض العكس الدخل له ويحول رواتبهم. أيضاً عدم وجود مسير رواتب للعمال وأمور أخرى كثيرة  المتسترين يتحايلون بها على الجهات الرقابية.