الأسفلت كعكه سوداء تسر الحافرين!

الأسفلت كعكه سوداء تسر الحافرين!

 المشكلة بالشارع الي يحفر عشرين مره بالسنة.

حقين الكهرباء يتفرجون على حقين الماء وهم يحفرون يخلصون يجون ركض على الكعكة السوداء ياكلونها أكل. ومثلهم #الاتصالات وهكذا. لا يوجد تنسيق بين الجهات الخدمية.. والأسواء لما جهة تقدم خدمتين مثل الماء وتصريف السيول تبعج الشوارع لأنابيب الماء وبعد كم سنه يجون لنفس المكان ويبعجونه مره ثانية وتشوف انابيب الماء ويحطون بجانبها مواسير تصريف السيول! طيب ليه من الأساس ما ضبطتوا أموركم من ميزانية وعقود وخلافها وخليتو الحفرية واحدة!! مادري بأي عقول تدار هذه الشركات؟ خلينا نقول #الغاز يحفر له بجانب الطريق من اليمين و #الكهرباء يحفر لها بجانب الطريق من اليسار وشبكة الهاتف مادري من وين والماء مادري وين.. حلو؟ طيب لما كان #المخطط فاضي من العمران ليه ما اشتغلتوا على شوارعه وضبطتوا الامور؟ على الأقل احفر الشارع من الرصيف إلى الرصيف وكل شركة تمدد خدمتها. اش ذنبي كل كم شهر تجي رصاصة تهز بيتي؟ الي طاحت عنده ثريا والي طاحت عنده مروحة شفط واللي يهز عنده درابزين الدرج.. زلزال بشري!! طريق الأمير محمد يمر في بيتي جلس 6 سنوات يشتغلون فيه أول ما خلصوا سفلته وتخطيط المسارات وبعض اجزاء الطريق باقي رشو مادة RC2 السائلة باقي السفلته أقسم بمن أحل القسم #شركة_الكهرباء و #شركة_المياه جو ركض وبدون نعال كأنهم صحوا من غيبوبة فجأه ما امدانا نفرح فيه إلا لعبوا بالشارع لعب. شركة المياه وقفت الشغل بالاجزاء الي كانت جاهزة للسفلته صارت الناس تمشي على المادة السائلة RC2 حتى طارت وطلعت الردمية وغبرة الشارع كأنك بمضمار الفروسية! وصبات وانابيب ماء كبيرة ثم صحصحت الكهرباء وجت طيران تبي تنزل خطوط الكهرباء الهوائية إلى أرضية وخذ حفر. يخيل لك ان الأسفلت كعكه سوداء تسر الحافرين يتسابقون عليها كل بياكل! ما امداهم يخلصون إلا جت شبكة تصريف #السيول وخذ حفر ودفن, أقسم بالله الطريق الآن تمشي معه كانك ماسك جادة برية كلها مطبات وحفر حتى الرصيف مكسر ومختلط الحابل بالنابل.. من شهرين مغير كراسي مكينة وقير ومسامير توازن والمساعدات والمقصات تنادي.. مادري هالهدر من المسئول عنه؟ شركات تجاكر بعضها بلا حسيب ولا رقيب ولا تنسيق. حتى الجامع ما فتحوا للناس طريق تشتكي على الامانة ويطنشون.. (مثل العجوز اللي جايز لها لعب عيالها بالشارع ) والحين جاي المسار الرياضي شوف الهوايل. الظاهر بيطعلون كل كيابل الكهرباء ومواسير المياه والصرف والسيول ويرمونها تسحيب مصارين ههههه ويبدون من جديد على قولة عادل إمام (متعودا دايما)

رابط المشاركة على موقع أكس:

https://x.com/Writer_100/status/1881128286853493066