زحمة الرياض

رد على موقع أكس (تويتر) حول زحمة الرياض..

صحيح ولا تنسى طريق خالد بن الوليد من يومه زحمة

يجي واحد يقولك الرياض مكانت زحمة!

الشق أكبر من الرقعة وزحمة الرياض معضلة كبيرة

والحل موجود من عهد الملك عبد العزيز رحمة الله من 80 سنة.

رحمه الله وطن الناس في أماكنهم. والله أذكر بالثمانينات الميلادية غرفة واحده شعبية بالنفود واصلها كهرباء، وإلى قبل 10 سنوات لما كنت ابحث عن بيت بعض مربعات حي لبن على مواطير كهرباء وأكيد كل الاحياء بأطراف المدينة نفس الوضع.

يارجل مدرسة عيالي ابتدائية درسوا فيها 5 سنوات على شارع ترابي ولا زالت والدائري الشمالي يبعد عنها 300 متر فقط. بغيت أذبح ذبيحة لما طلعوا للمتوسطة بمدرسة ثانية.

المشافي المتقدمة بالرياض..

عندك مشكلة كبيرة بإدارة حكومية أو شركة راجع الرياض.

أذكر مشكلة مع شركة تأمين بحكم صغر سن الولد والحادث بالقصيم قالوا راجع مقر الشركة بالرياض.

وظيفة مالك إلا الرياض!

جامعة فقط كانوا 8 جامعات مالك إلا الرياض إذا تبي جامعة صح (جامعة الملك سعود)

حتى الكليات العسكرية بالرياض.

باقي يقولون تبي "خبز" رح الرياض.

وحتى اللي يبي ينقل من الرياض يعرقلونه عقد من الزمن ولا يفرح بالنقل.

وجدة والدمام على نفس الوضع.

والآن مهرجانات الترفيه كبت "بعض الناس" على الرياض حتى من دول الخليج والعالم أجمع! فما بالك بالمؤتمرات والمعارض. حتى وصل سعر الشقة 3 غرف 35 ألف..!!

الحل كما أسلفت موجود من عهد الملك عبد العزيز.

وهو الحد من الهجرة الداخلية.

طيب .. فتحوا جامعات ولله الحمد ووصلت أعتقد فوق 30 جامعة وان شاء الله كلها بمستوى جامعة الملك سعود وأكثر.

لكن باقي خدمات كثيرة محصورة بالمدن الكبرى وهي سبب استمرار الزحام.

عذرا على الإطالة.

09:55 ص ‏02/‏03/‏46